Proxy

પંજાબના ગુરદાસપુરમાં આંતકવાદીઓએ હૂમલો કર્યો. કાશ્મીરમાં હાલતા આપણા નઠારા પાડોશી ભાડુતી માણસોને લલચાવી કે ધર્મના નામે, જેહાદના નામે ઘાતકી હૂમલા ચાલુ રાખે છે. હમણાં જ છત્તિસગઢના શિક્ષણ મંત્રીના ધર્મપત્ની પર આરોપ મુકાયો કે તેમણે પોતાની પોસ્ટ-ગ્રેજ્યુએશનની પરીક્ષા આપવા બીજા ઉમેદવારને બેસાડી જે તેની બહેન જ હતી. પોલીસ ‘તપાસ’ કરશે! આ બધામાં એક બાબત સામાન્ય છે : જે તે વ્યક્તિને બદલે આ બધા કામ બીજી વ્યક્તિ પાસે કરાવાય છે, જે આ કામ કરે તેને કહેવાય proxy.

મિડલ ઇન્ગ્લિશ ભાષામાં નો શબ્દ ‘proccy’ આજે proxy બની ગયો છે. પ્રોક્સી એટલે એવી કોઈ વ્યક્તિ કે જેની પાસે લેખિત અધિકારો છે કે તે કોઈ વ્યક્તિના બદલે હાજરી પુરાવી શકે, represent કરી શકે, મીટીંગમાં વોટ પણ આપી શકે.

બ્રિટીશ સરકાર ખાસ કરીને ચૂંટણી સમયે બહાર ગયેલ નાગરીકને પ્રોક્સી વડે મત આપવાની સવલત આપે છે. ગુજરાત સરકારે આ વાત ‘ફરજીયાત મતદાન’ સંદર્ભે વિચારવી જોઈએ. પાકિસ્તાન તેના નાપાક ઈરાદાઓ પાર પાડવાં ‘પ્રોક્સી વોર’ શરુ રાખે છે. પ્રોક્સી વોરમાં મોટે ભાગે દેશો તેના દુશ્મન દેશના વિરોધીઓને ઉશ્કેરે કે તેને મદદ પૂરી પાડે છે, જેથી વિરોધી દેશ લડાઈ કરવામાં વ્યસ્ત રહે. ‘proxy war’ ખાસ કરીને વિશ્વ યુદ્ધોની આડપેદાશ છે. કોલ્ડ વોર પણ પ્રોક્સી વોરનો જ પ્રકાર કહી શકાય.

નામદાર સુપ્રીમ કોર્ટનાં હૂકમને કારણે કેન્દ્ર સરકારે ૮૦૦ કરતા વધું પોર્ન વેબસાઈટ ‘બેન’ કરી દીધી દેતા જ સોશીયલ મીડિયા પર પહેલું રિએક્સન આવ્યુ કે આ લોકશાહીમાં મળતા પર્સનલ ચોઇસનાં અધિકાર પર પ્રતિબંધ છે; બીજુ રીએક્સન એ આવ્યું કે આ ‘બેન’ ઇફેક્ટીવ નથી! કારણકે ‘proxy servers’. ન્યુઝ પોર્ટલ્સ અને ટેક્નોલોજી પોર્ટલ્સ પર આ ઇંડિઅન સર્વર્સને બાયપાસ કરવાની ટ્રીક સમજાવતા આર્ટીકલ્સ ખૂબ વંચાયા. છેવટે સરકાર પાણીમાં બેસી ગઈ.